常見的母乳喂養問題（以及如何解決）

回想呢段育兒嘅日子，其中一樣我最感恩嘅決定就係選擇餵母乳。

我嘅全母乳之路，行咗八個月，後來慢慢加入配方奶，都有埋身到一歲兩個月。仲為咗容易記得，我揀咗二零二二年嘅一月一日做呀女正式脫離母乳嘅日子。

相信每個新手媽媽都有考慮過到底餵唔餵母乳，可以肯定嘅係每個媽媽都想俾自己個小朋友最好嘅嘢，最重要嘅係，知道你有乜嘢選擇，同埋點樣去實行。當遇到困難時，記得要搵人幫手，唔好自己收收埋埋！

你準備好未？等我話俾你聽，餵哺母乳絕對係有血有淚。又腫又痛嘅胸脯，乳腺塞咗導致發燒，半夜起身三四五次埋身，經常漏到衣服濕透，俾寶寶啜到流血，長期同奶泵生活，胸脯走樣… 咪住先，又話好感恩餵母乳嘅？係㗎，係好辛苦㗎，如果唔識搵方法解決，自己默默承受，鐵人都頂唔住！所以等我同大家分享下我嘅經驗啦。

1. 產前做好心理建設及資料搜集
   唔好睇相以為寶寶好似天使咁瞓係媽媽心口就會啜奶，雖然飲奶係本能，但新手就係新手，大家都要一齊學習。建議媽媽們懷孕時就了解多啲餵哺母乳嘅方法及注意事項，例如母乳中的成分包括天然乳脂層有可能因媽媽的心情而變動，所以日常保持心境開朗，減輕自己的心理負擔，上網有好多資訊，坊間亦都有好多參考書可以參考。
2. 同有經驗嘅人取經
   我哋呢一代人可能都有呢個共通點，就係上一代嘅媽媽好多時餵奶粉，所以我嘅媽媽都係，餵母乳呢個課題上提供唔到好多建議。所以當我請陪月時，就揀咗個有催乳按摩證書嘅姨姨，真係幫咗我好多。仲可以同身邊已經做咗媽媽嘅朋友交流下，會俾到好多有用嘅資訊，例如佢地會介紹我食天然乳脂精華既食物會對上奶有幫助，有心靈上嘅支持。
3. 諮詢專業人士嘅意見
   婦科醫生、家庭醫生、醫院產房嘅護士，都係我尋求專業意見嘅渠道。我係喺提倡母乳餵哺嘅醫院生產嘅，當時啲姑娘就教咗我好多嘢。仲有，帶寶寶去健康院檢查時，都可以請教啲姑娘㗎。依家仲有國際認可嘅母乳顧問，可以俾到最切合你嘅專業意見。
4. 選擇適當嘅產品
   巿面上有好多唔同嘅奶泵：手提、無線、單泵雙泵，可以滿足你唔同嘅需求。每個媽媽都有不同嘅需要，一個合適嘅工具真係事半功倍。建議了解產品嘅種類，再考慮自己嘅生活習慣再作選擇，如果使用上有不適，就可能要試另外一款比較一下。另外，仲有好多提升母乳嘅補充品，諮詢咗專業人士意見後，要好好利用呀！
5. 適當地儲存泵取嘅母乳
   每一餐都埋身，真係會好攰，有時身邊嘅親人可以幫手係最大嘅支持。呢個時候，就要善用冰箱嘅儲存啦！有啲媽媽會擔心，雪過嘅母乳會唔夠新鮮冇晒營養。其實研究指出，即使雪過嘅母乳，只要儲存適當，營養成份包括天然乳脂層仲係好高，係寶寶最佳嘅食物！
6. 保持輕鬆愉快嘅心情
   最後，亦都係最重要嘅一點，媽媽們要學識放鬆心情。記得唔好俾壓力自己，餵或不餵母乳，並非決定你是否好媽媽嘅指標！多做運動，飲食健康，你開心，寶寶就會開心。

祝大家育兒之路，一切順利，寶寶開心健康成長！
 

本文章內容屬作者個人意見，並在作者同意下轉載。內容不代表任何品牌之言論及立場。